伍允龙:为骚肌进行地狱式“脱水”其实系好伤身

由陈展鹏、唐诗咏、王君馨、刘颖镟、陈山聪、伍允龙及姚子羚领衔主演的无线重头剧《唐人街》,2月28日众演员出席在将军澳电视城举行的拜神仪式。世界上起飞腿最多的演员伍允龙,又有新力作,今次剧集再唔会见到咁多飞腿,冇变嘅系一样咁好打。伍允龙开心表示:“今次我同监制商量过,如果喺故事上面冇任何冲突呢,我就选择‘南拳’,因为我爸爸始终佢系教‘蔡李佛’,所以容易啲畀我演绎,今次踢腿方面系有,但就一定冇以前咁丰富。”

剧集卖点除了剧情令人动容之外,最为吸晴之处系睇到几位型男赤裸上半身大骚肌肉,为每场打斗场面增添色彩,正因为咁伍允龙特别为自己进行“脱水”过程,希望令肌肉更为明显,其实过程相当辛苦:“当我下个星期要拍嘅时候,就要开始做脱水准备,头4至5日就要不停灌水,尽量屙晒体内嘅盐分出嚟,到拍之前个晚连晚餐都唔食,开始唔再饮水,如果口干最多手指掂少少水,轻轻拍喺嘴唇边,到我哋拍完,都有可能二十几个钟冇食过嘢同真正饮过一啖水,其实咁样做法系会伤身,但为咗出嚟个效果好都冇办法!”