Angelababy三十岁生日

时间总系喺不知不觉间流走,有啲艺人看似仲好年轻,但原来眨眼间已经出道十几年。Angelababy 十四岁已经出道,话咁快出道16年,仲已经同黄晓明结婚兼生埋囝囝小海棉。2月28日正正系Baby 三十岁生日,佢并无放假休息反而飞到巴黎出席时装周活动,而老公黄晓明就喺网上放闪,罕有孖住囝囝小海绵为Baby送上惊喜。

一踏入28号凌晨零时,晓明就秒速发微博,简单写低4只字:“生快,美妈。”虽然未有tag人但大家都深明系为老婆Baby庆祝。佢仲上载咗2张相,一张系孖住囝囝画画,而另一张就系佢地嘅大作 — 一个戴住皇冠嘅小公主,应该就系代表住Baby系佢地心目中永远嘅公主,真系好甜蜜呀﹗

Baby同晓明一向非常保护囝囝,避免佢嘅样貌曝光,17年尾就曾经有媒体刊登小海绵正面照,令黄晓明于网上留言怒斥“不顾道德底线”。虽然呢次父子合照只系影到小海绵头顶,但肥嘟嘟嘅小手,加上超浓密发量,已经引来网友热议,仲话令佢地谂起日本一个因为发量多而爆红嘅BB Chanco添。

网友笑言小海绵嘅发量可以同日本BB Chanco相提并论。(BabyChanco IG)