有我喺度唔使惊 罗家英做大男人 保护爱妻汪明荃

罗家英日前应好友苑琼丹(苑仔)邀请,亮相香港开电视节目《开工大吉77》访问,家英哥来自粤剧世家,爸爸从小教导要传承粤剧文化,自此肩负重任:“爸爸话佢养大仔女,全靠华光师傅赐啖饭畀我哋食,爸爸仲话做戏唔系低下阶层,系社会一分子,所以要求我将戏曲同粤剧传颂落去,做人不能忘本!我由1973年开始已经为粤剧宣传,不时要去为新一代上堂。依家我几忙,有五个徒弟、百几个学生啦,我爱人(汪明荃)不时嚟帮手指点,唔系教佢哋功架,教佢哋做戏。”

访问期间,苑仔追问罗家英与汪明荃拍拖趣事,家英哥笑指招架不住,唯有坦白交代:“同苑仔系好朋友,访问一开始我都话咗‘唔好讲感情嘅嘢呀’,但佢问到阿姐嘅嘢,特登啄住嚟问!不过真系好耐冇见,所以好多嘢都要讲嘅。”

苑仔问何以家英哥吸引阿姐,可惜被对方游花园:“我都唔系好明白,佢都冇同我讲,我点知佢钟意我咩唧!我对佢都唔算细心,又唔算好迁就佢,外界嘅人以为佢恶过我都好正常,因为佢对工作好严谨、要求好高,谂住佢对罗家英都系咁,实情系…都差不多啦,我好难讲得出口,好难答!”家英哥自言不浪漫,为给阿姐名分而结婚,笑指自己思想陈旧:“我哋冇示过爱,第一次拖手系过马路,拖吓放手又拖吓咁,之后睇戏佢话好惊就拖住我,大概系咁啦。”

二人先后经历大病,过程中互相支持,撑起对方的心灵:“其实系阿姐病先嘅,我记得有一次佢内地开会,突然打畀我话要返香港睇医生,咁我咪去接佢囉,知道要做手术佢都惊惊哋,全靠我喺旁边做大男人,‘保护你,唔使惊,有我喺度!’,佢好感动囉。”

由粤剧界跳进电影圈,第一次拍戏参演成龙作品,后来再被郑丹瑞相中改变一生:“当时佢话揾罗家英拍剧,咁啱谷德昭睇完又介绍我畀周星驰识,就系咁做咗‘达文西’呢个角色,同阿星撞出火花。同时我都拍紧《女人四十》,当时都系叫我做搞笑,但拍拍吓许鞍华叫我唔好搞笑,做感情戏。后来佢问我想角逐男主角定系男配角,我认为男配角机会较大,最终就赢咗金马奖。”